Frá byrjun til dagsins í dag
Við elskum söguna okkar sem byrjaði á litlu gistihúsi í miðborg Reykjavíkur. Hún er sönn, heiðarleg og ansi spennandi á köflum – en umfram allt felur hún í sér drauma sem enn lifa í dag.
Sagan okkar: fjölskyldufyrirtæki frá 1994
Center Hotels er íslensk hótelkeðja í eigu íslenskrar fjölskyldu. Ævintýrið hófst árið 1994 með 14 herbergja gistiheimili í Reykjavík. Í dag rekum við átta hótel og eitt íbúðahótel, öll í hjarta borgarinnar. Flest þeirra eru í byggingum sem áður gegndu allt öðru hlutverki. Hér er sagan af því hvernig fjölskylda frá Akranesi byggði Miðbæjarhótel upp, eitt hótel í einu.
Ljúft upphaf
Eigendurnir, Kristófer og Svanfríður, ólust upp á Akranesi. Þau kynntust tíu ára gömul og giftu sig árið 1975. Síðan tóku við sex ár við nám í Svíþjóð þar sem Svanfríður lærði svæfingahjúkrun og Kristófer hagfræði og byggðaskipulag. Árið 1987 fluttu þau heim. Svanfríður hóf störf sem hjúkrunarfræðingur og Kristófer sem ráðgjafi. Á leiðinni bættust við þrjú börn: Maron, Sara og Anna Ólöf.
1994 – Lítið gistiheimili við Flókagötu
Faðir Kristófers, Oliver, bjó á Gistiheimilinu Flókagötu 1 og starfaði þar sem næturvörður. Þegar eigandinn bauð honum að kaupa gistiheimilið leitaði hann til sonar síns. Kristófer og Svanfríður keyptu 14 herbergja gistiheimilið og þar með hófst ævintýri okkar í ferðaþjónustu. Svanfríður hætti í hjúkrun til að sjá um daglegan rekstur og afi Oliver stóð áfram næturvaktina. Börnin þrifu herbergin og báru fram morgunmat eftir skóla áður en þau færðu sig yfir í gestamóttökuna. Allir byrjuðu því á byrjuninni.
1998 – Skjaldbreið: unnið hörðum höndum
Fjórum árum síðar keyptum við fyrsta hótelið okkar, Hótel Skjaldbreið við Laugaveg, aðal verslunargötu Reykjavíkur. Þetta virðulega hús var upphaflega apótek þar sem lyfsalinn bjó, starfaði og bjó til lyf. Það að kostaði mikla vinnu að breyta húsinu í 33 herbergja hótel. Þegar Kristófer var að fjarlægja brotinn glugga munaði minnstu að hann missti höndina. Sem betur fer þekkti Svanfríður sérfræðing í taugalækningum sem gerði tímamótaaðgerð á handleggnum. Kristófer var mættur aftur til vinnu daginn eftir. Það má því með sanni segja að við höfum unnið hörðum höndum við að opna Skjaldbreið. Bókstaflega.
2001 – Klöpp: úr fréttunum í draumalandið
Annað hótelið okkar, Klöpp, opnaði í húsnæði sem áður hýsti Ríkisútvarpið. Húsið sem eitt sinn flutti þjóðinni fréttir varð að 46 herbergja hóteli, í nokkurra mínútna göngufæri frá Skjaldbreið. Nú vorum við komin með tvö hótel í miðbænum og gáfum þeim sameiginlegt nafn: Miðbæjarhótel, eða Center Hotels. Þar með kviknaði hugmyndin að hótelkeðju í hjarta Reykjavíkur. Um leið stækkaði fjölskyldan, því starfsfólkið á báðum hótelunum varð hluti af henni.
2006 – Þingholt: prentað í hjarta okkar
Þriðja hótelið kom með sögu sem við gátum ekki staðist. Frá 1942 til 1994 var þar prentsmiðjan Ísafold, sem prentaði meðal annars Morgunblaðið. Byggingin stendur við Þingholtsstræti, eina elstu götu miðbæjarins. Hverfi með svona mikinn karakter átti skilið að fá hótel í sama anda. Í stað þess að fylgja stíl fyrstu tveggja hótelanna fórum við nýja leið og gerðum Þingholt að boutique-hóteli. Þar eru 52 glæsileg herbergi, hvert með sinn eigin svip, og hótelið hefur verið lítill gimsteinn í miðbænum allar götur síðan.
2007 – Arnarhvoll: nýr kafli við höfnina
Árið 2007 var annasamt og færði okkur byggingu með persónulega sögu. Húsið við höfnina var byggt árið 1933 og var teiknað af hinum þekkta arkitekt Guðjóni Samúelssyni. Þar var áður Vélstjóraskólinn, þar sem faðir Svanfríðar stundaði nám. Það eru ekki mörg hótel sem geta státað af því að fjölskyldumeðlimur hafi setið þar á skólabekk. Hótelið stendur líka á einum skemmtilegasta stað miðbæjarins. Á aðra hönd er miðborgin og á hina er óhindrað útsýni yfir sjóinn í átt að Esjunni. Á Center Hotels Arnarhvoll eru 104 herbergi, heilsulind og setustofa og bar á efstu hæð þar sem hægt er að njóta útsýnisins í allar áttir.
2009 – Plaza: enn og aftur í fréttunum
Við virðumst hafa sérstakt dálæti á dagblöðum. Fimmta hótelið okkar, Plaza, var byggt fyrir skrifstofur og prentsmiðju Morgunblaðsins. Center Hotels Plaza stendur við Aðalstræti, elstu götu Reykjavíkur. Fyrir framan hótelið er Ingólfstorg, elsta torg borgarinnar og miðpunktur ýmissa viðburða í miðbænum. Plaza er stærsta hótelið okkar, með 255 herbergjum fundar- og veislusölum.
2015 – Miðgarður: nýr kafli í gamla bankanum
Það þarf ævintýraþrá til að byggja upp hótelkeðju. Eftir tvo áratugi af mikilli vinnu létu Kristófer og Svanfríður loks drauminn rætast og sigldu af stað umhverfis jörðina. Þau skildu hótelin eftir í höndum dóttur sinnar og trausts starfsfólks. Sama ár opnuðum við Miðgarð í byggingu sem áður hýsti Búnaðarbanka Íslands. Í dag er gamli bankinn allt annað en rólegur. Þar eru 170 herbergi, afgirtur garður, heilsulind, fundarsalir og viðburðarými af öllum stærðum. Í hjarta hússins er Jörgensen Kitchen & Bar, þar sem lifandi tónlist ómar alla fimmtudaga.
2019 – Laugavegur: leiðin að laugunum
Laugavegur dregur nafn sitt af gömlu leiðinni að Þvottalaugunum, þangað sem Reykvíkingar fóru áður með þvottinn sinn. Í dag er Laugavegur aðalverslunargata borgarinnar og heimili sjöunda hótelsins okkar, með 102 herbergjum, veitingastaðinn Lóa Matur & Vín ásamt bar. Á 25 ára afmælinu endurnýjuðum við ásýnd Center Hotels og Laugavegur varð fyrsta hótelið í nýja búningnum. Hluti af nýju ásýndinni er að kynna fyrir gestum okkar allt sem íslenskt er, hvort sem það eru sögur um Ísland eða íslendinga, tungumálið okkar, staðir og menningu - allt með það að markmiði að gestirnir okkar kynnist Íslandi og finnist þeir sömuleiðis vera hluti af Miðbæjar fjölskyldunni.
2021 – Grandi: með stáltaugar
Eftir mjög krefjandi ár 2020 opnuðum við áttunda hótelið okkar á Granda. Húsið hýsti áður vélsmiðju Héðins, þekkts fyrirtækis í vélsmíði og stáliðnaði. Grandi er eitt líflegasta svæði miðborgarinnar, við hafnarsvæði í mikilli uppbyggingu þar sem skapandi starfsemi vex og dafnar. Þetta er hverfi sem er stöðugt að breytast og er frábær bækistöð fyrir þá sem vilja vera þar sem hlutirnir gerast. Hótelið opnaði með 195 herbergjum en árið 2026 bættum við 30 við, svo nú eru herbergin 225 talsins. Á hótelinu er Grandi restaurant & bar, auk viðburðarýmis og fundarsala. Heilsulindin er einstaklega glæsileg með þakglugga beint yfir heita pottinum, þannig að hægt er að slaka á og horfa beint upp í himininn.
2023 – Þingholt Apartments: eitthvað alveg nýtt
Í gegnum árin höfum við fundið að fjölskyldur með börn og vinahópar vilja vera saman í einu rými og við hlustuðum. Fjölskyldumeðlimur númer níu er því aðeins öðruvísi en hin hótelin okkar. Þingholt Apartments er íbúðahótel með 31 rúmgóðum hótelíbúðum fyrir allt að sex gesti, við Þingholtsstræti, rétt við Laugaveg. Þar er hægt að elda morgunmat saman, skipuleggja ævintýri dagsins í rúmgóðri íbúð með allt til alls.
Enn fjölskyldufyrirtæki
Meira en þrjátíu árum síðar stendur fjölskyldan enn vaktina. Bæði börn og barnabörn hafa starfað í fyrirtækinu og mörg þeirra gera það enn og sjá um allt frá tæknimálum og rekstri til sölu- og markaðsmála. Í kringum þau er stærri fjölskyldan; um 350 starfsmenn sem taka á móti gestum á hverjum degi og aðstoða við að njóta dvalarinnar og gefa góð ráð um allt það besta sem Reykjavík og Ísland hefur upp á að bjóða. Kíktu við og sjáðu hótelin okkar.
